ეროვნული უსაფრთხოების საბჭოს აპარატს დანიის სამეფოს თავდაცვის სამინისტროს წარმომადგენელი და ნატო-ს შტაბ-ბინის სამოქალაქო უსაფრთხოების ექსპერტი ეწვივნენ
7 ოქტომბერი 2022
საქართველოში ვიზიტის ფარგლებში, ეროვნული უსაფრთხოების საბჭოს აპარატს დანიის სამეფოს თავდაცვის სამინისტროს საგანგებო სიტუაციების მართვის სააგენტოს წარმომადგენელი ქრისტინე ჰოეგი და ნატო-ს შტაბ-ბინის სამოქალაქო უსაფრთხოების ექსპერტი იოან კარლსონი ეწვივნენ.
ეროვნული უსაფრთხოების საბჭოს აპარატის უფროსის მოადგილემ, გიორგი ღიბრაძემ და კრიზისული ვითარების მართვის ეროვნული ცენტრის (დეპარტამენტის) წარმომადგენლებმა სტუმრებს კრიზისების მართვის ეროვნული სისტემა და მისი გაძლიერების პრიორიტეტული მიმართულებები წარუდგინეს.
მხარეებმა საქართველოს საჭიროებებზე მორგებული მხარდაჭერის პაკეტის ფარგლებში განსაზღვრული სტრატეგიული მიმართულებები მიმოიხილეს, რომელთა ინკორპორირება ნატო-საქართველოს არსებითი პაკეტის (SNGP) კრიზისების მართვის ინიციატივაში იგეგმება.
SNGP-ის კრიზისების მართვის ინიციატივის შესრულებას ქართული მხრიდან ეროვნული უსაფრთხოების საბჭოს აპარატი, ხოლო დანიის მხრიდან - დანიის სამეფოს საგანგებო სიტუაციების მართვის სააგენტო უწევს კოორდინაციას.
შეხვედრას ასევე ესწრებოდნენ კრიზისების მართვის ინიციატივის დანიელი ექსპერტი სუზანა კრისტენსენი და საქართველოს თავდაცვის სამინისტროს წარმომადგენლები.
