ეროვნული უსაფრთხოების საბჭოს აპარატის უფროსი დანიის სამეფოს ელჩს შეხვდა
15 თებერვალი 2023
ეროვნული უსაფრთხოების საბჭოს აპარატის უფროსმა, გივი თუმანიშვილმა დანიის სამეფოს საგანგებო და სრულუფლებიან ელჩთან საქართველოში, ანე ტოფტ სორენსენთან გაცნობითი შეხვედრა გამართა.
გივი თუმანიშვილმა დანიის პირველ რეზიდენტ ელჩს საქართველოში ახალ თანამდებობაზე დანიშვნა მიულოცა და მომავალ საქმიანობაში წარმატებები უსურვა.
აპარატის უფროსმა სტუმარს საბჭოს და მისი აპარატის საქმიანობის ძირითადი მიმართულებები გააცნო. გივი თუმანიშვილმა ელჩს მადლობა გადაუხადა საქართველოს კრიზისების მართვის ეროვნული სისტემის შესახებ უწყებათშორისი სახელმძღვანელოს შემუშავების პროცესში დანიის სამეფოს მხრიდან გაწეული დახმარებისთვის და ორ ქვეყანას შორის თანამშრომლობის გაღრმავების იმედი გამოთქვა.
აღსანიშნავია, რომ ნატო-საქართველოს არსებითი პაკეტის (SNGP) კრიზისული ვითარების მართვის ინიციატივის იმპლემენტაციის ნატო-ს მხრიდან წამყვანი სახელმწიფო დანიის სამეფოა, ხოლო საქართველოს შესაბამისი უწყებების წარმომადგენლების ჩართულობის კოორდინაციას ეროვნული უსაფრთხოების საბჭოს აპარატი უზრუნველყოფს.
შეხვედრაზე მხარეებმა ასევე მიმოიხილეს რეგიონული უსაფრთხოების გარემო და არსებული გამოწვევები. საბჭოს აპარატის უფროსმა და დანიის სამეფოს ელჩმა საქართველოსა და დანიის სამეფოს შორის უსაფრთხოების სფეროში სამომავლო თანამშრომლობის შესაძლებლობებსა და ინიციატივებზეც იმსჯელეს.
შეხვედრას ასევე დაესწრნენ ეროვნული უსაფრთხოების საბჭოს აპარატის და დანიის სამეფოს საელჩოს წარმომადგენლები.
